Kodak estrea a súa tenda en liña en España

Eastman Kodak Company, unha das compañías máis innovadoras do mundo no sector da imaxe, vén de anunciar que desde esta mesma semana, todos os seus clientes en España poderán adquirir produtos da marca sen ter que desprazarse dos seus fogares, pois a entidade vén de crear a súa tenda en liña, que xa leva tempo funcionando noutros países con resultados moi positivos.
Desta maneira, os clientes da coñecida firma, poderán adquirir todo tipo de produtos relacionados coa imaxe dixital e analóxica e telos nas súas casas nun prazo aproximado de 8 días.
A tenda en liña foi creada, segundo afirman os seus responsables, para facilitarlle a compra de produtos Kodak aos usuarios, e dese xeito incrementar considerablemente as vendas.
Para comprar en liña, os usuarios só teñen que entrar na páxina oficial de Kodak España, buscar e comparar os produtos dispoñibles e realizar as compras directamente de maneira rápida e doada.